Poezie van eigen bodem!
Gedichten van Broeksittardse bodem
Ouch dit jaor wil ich neit in gebraeke blieve
En get euver de keuning van de sjötterie sjrieve
Waal eine maondj te laat,
Mer me nump 't wie me t 'nump
En natuurlijk ere wae ere toekump
Ein kirmes mit prachtig waer
Dus bezuikde me 't vogelsjeite gaer
En wie de lèste kroetdampe ware opgetrokke
Bleek 't Wil Mohren dae 't bees nao ònger haw doon lokke
Eine keuning mit ervaring
Omdat hae al drie maol mit dae titel loupe ging
Dat waor in 't Dutsje Sjawbrouk
Dao sjeit 'r ouch es Keizer te bouk
Hae trèk dit seizoen mit ei Broukzittesj maedje aan zien zie
Want dörpse Marjan sjeit haom es zien keuningin bie
Zie zulle dees titels mit ere drage
Perficiat en dat geer mit succes zult sjlage.
Jan Dieteren 2015
Veur Keuning Pascal's zilvere periode
Verdeint deze sjnaak ein ode
Es waore sjöt en keuning droug hae't eremetaal
Mer nao ei jaor mit de kirmes wurt die draagkans sjmaal
Dan kòmme weier nuuj runj, nuuj kanse
Es ouch anger sjötte òm de vogel zeen aan't sjanse
D'n eine wilt 'm gaaroets neit
En d'n angere zaet jaowaal, ich bèn't dae d'r veur geit
Zo is 'dr ummer waal ei grupke elite kandidate
En veural die hawte zich en dae voogel in de gate
Dit jaor ware d'r ei stök of tich
Die hunne blik op dees keuningstitel hawwe gerich
Mer sjlechs eine is de richtige persoon
Dae mit zien keuningin 't ei jaor lank es Lambertuspaar maag doon
Zo leit de voogel dit maol nao de sjeut van Hein zich aan zie sjtertje vange
En moch sjöt Nieling zich mit 't keuningszilver laote behange.
Jan Dieteren 2002
Kirmes oppe pleij
Zo wie me dat al jaore heij
Vònj wei'r in september plaatsj
En de gewaersjeut klònke mit geklaatsj
't Waer sjpeelde neit zo mit
Op de zòndigse sjipkesrit
Baeter waor 't kenjersj deil
Onger 't rupsje zeil
Sjötte en fanfaar trokke door de sjtaote
Om de luu te laote weite oppe voogel wurt gesjaote
Mit de waergoode waor neit te kalle
Raengedröppele bleeve oet de lòch valle
Geneudigde gònge de shotte veru
Gemeinte, geestelikke en tal van anger keur
Me bekeek 't gevech van achter de roete
't waar eigenlijk geen waer boete
Twee man gònge veur hun kans
Pascal en d'n angere sjöt Frans
Eene tweesjtriet op 't sjerps van de sjnee
En Frans woar 't meeste tevree
Hae dreeg veur ein jaor 't Lambertus-eremetaal
En zorg veur keuningsbeier oppe zaal
Zal mit zien keuningin oppe sjöttefeeste paradeiere
Perfisiat keuningspaar, laot uch mer feteiere.
Jan Dieteren 2000
In September sjtong Broukzitterd wei'r garant
Veur femiejebezuik en de kirmesexploitant
En òs sjötterie Lambertus kadette
Douge ònger de sjtang hun beste beinke veur zette
De sjtoebbe woorte veur gout gesjròb
En in de hoeskamer oppe taofel bloume mit feyne knòp
Op de kirmespley eine kraom mit lekkere vösj
Bie de luu woort feestelijk opgedösj
De drumband van de sjötterie en dat gebeurde al dekker
Leip om zös oere aaf veur vööle es wekker
In de kaffees leip de kraan deks rap
't Lekkesjte pötje beier woort getap
Sjmorgens get reange-echtig en nevel
Vlagge rood-wit-blauw seierde mennige gevel
Nao de nuu sjeitwei hau me de luip
De kreeg dit jaor de eesjte duip
Nao de middig keek 't dörp al wei'r oet
Langs de sjtraot, oppe pley en achter de roet
Wae me dit's keer moch wardeiere
Om 't gewichtig keuningszilver te prissenteiere
Deze keer sjtong Zef Suijkerbuik in't middelpunt
Hööm en zien keuningin is 't van harte gegunt
Maondig en daensdig mochte zie alvas parodeiere
Wie ze mit hun sjötterie Lambertus ròntj marsjeierde.
Jan Dieteren 1996
Eine richtige sjöt zal èns sjlaage
Om 't eremetaal te maoge draage
Nómmer ein te zeen mit zien koogel
Dae 'n èntj maak aan de voogel
Vruiger hoog in de lòch oppe sjtang blikvenger
Noe van plestik mit d'r achter de koogelvenger
Oppe ei veljt wo de hunj waere oetgelaote
Woort op 'm gesjaote
Klantje zat oppe lies
Mer eine wint mer de pries
Dae woort d'r op aan geloods
En dreeg es naam Michel Voots
Gewaerdraeger en leifhöbber van blaosmeziek
Geine inwooner, mer waal aanhenger van 't Haneriek
Ei jaor langk keuning door deze sjtunt
Michel perfisiat, 't is dich door gans Broukzittert gegunt.
Jan Dieteren 1995
In september, zo haf'r waeg
Dan sjut me waer ge slaeg
Want jao, dat is jus
''t fees van St. lambertus
Dan is't in Brouksittard druk
Veural es me begint aan 't sjötte hoofsjtuk
Die knalle dan mit hun gewaere
Om sjötte-keuning te waere
Me wit joa-waal
Drager veur ein jaor, van 't eremetaal
't waar waer een sjpannend gevech
Doch onerlinge sjtried is nooit sjlech
En zo woort Joe es keuning gekroond
Doa mit vuer zien sjeite beloond
En noe geit HILDE mit es keunigin
Proficiat keuningspaar, en hawt de moud d'r in.
Jan Dieteren 1985
Oos Sjötterie
Sjötterie, traditie wo ich van hauwt,
doe bés al eeuwe auwt.
Jaore seere de sjötte al oos sjtroate,
al jaore höbbe ze de vogel gesjoate.
Meziek van trööte en tròmme leet 't oos heure,
d'r sjteit in 't dörp gèt te gebeure.
De sjötte zeen ummer waal van de partie,
ze heure in 't Limburgs landj derbie.
Ze hauwte tradisie en folkloor in sjtandj,
en brènge ooze gooje naam door 't ganse landj.
Greutsj en sjtram in de maot,
trèkke ze door de sjtraot.
In uniforme mit glanzende knuip,
d'r is neit eine sjöt dae oet de pas luip.
'T waore soldaote veur dörp en kirk,
't is de processie woo geer dat noch aan mirk.
De sjötte besjerme noch ummer Oos Leeven Heer,
en dat vènje ze ein groote eer.
Op de sjtang sjteit de vogel al klaor,
wae wurt de keuning van dit jaor.
Wae sjut 'm aaf, 'ne auwen heer of 'ne jònge vènt,
eine geweune soldaot of eine offizeer mit cent.
Ze zulle de keuning sjtrak waal presenteare,
in hun sjoon pèkskes mit vaere.
En ouch 't maedje dat ès keunigin mit geit,
mit bloume geseerd in 't sjiekste kleid.
De keuning wurt mit zilvere plaate òmhange,
dit jaor luip hae tösje de hoogste range.
't Ganse jaor regeert hae zien sjötterie,
en luip hae in de veurste rie.
Es ze nao ein sjöttefees gaon,
mõt hae veur de jurie in de rie gaon sjtaon.
In einen optoch trèkke ze ròndj,
waat is oos Limburg dan sjoon bòntj.
Bielemen, tamboers, generaals en offizere,
en al die vaane die de grope seere.
Gaeve ein sjtòkske Limburgs folkloor eweg,
bie ´t defilé gaeve ze zich pas éch.
Daonao gaon ze ekserseere en tròmme,
en sjeite es ze mit de búkse kòmme.
Òm priskes wurt dan gesjaote,
ich hoap dat ze dat de sjötte ummer laote.
Sjötterie, veer wille dich neit kwiet,
ouch neit in deeze moderne tied.
Doe höbs oos eeuwe lank bie gesjtànge,
noe helpe veer dich en behartige dien belange.
Wètte en alle moderne papiere kroam,
sjlaon de sjötte òp de oam.
Mèr veer blieve achter oos sjötte sjtaon.
zodat ze in lengte van daag door oos sjtroate gaon.
Peter Camps
Vogelsjeite
Jederein sjteit achter de roet,
't is fees in 't dörp, de sjötte trekke oet.
Me heurt ze al van wiets kòmme,
mit hun trötte en tròmme.
Waat drage ze sjoon pekskes mit vaere,
sjtrak zulle ze hunne keuning prezentaere.
Op de sjtang sjteit de vogel al klaor,
Wéh zou keuning waere dit jaor?
Eine auwe kael of eine jònge vent,
eine erme jòng of eine heer mit völ cent.
Veer zulle 't vlot genòg weite,
want de sjötte zeen al aan 't sjeite.
De vogel wurt kaal, hae ruselt al goud,
op de sjtang sjteit allein nog ein sjtök hout.
Eine auwe offezeer van oos sjötterie,
sjteit op sien beurt te wachtte in de rie.
Auchal zuut opa 't ein bietje sjlech,
mit vogelsjeite is hae nog ummer aeve vrech.
Hae lèk aan, 't is doodsjtil en dan .... paaf,
Dao sjut mich opa de vogel aaf !!
Ein bietje wiejer op, wurd ein maedje wit,
die kleindochter wèt, ich mòt noe mit opa mit.
Opa geit mit 't maedje 't sjoonste kleid koupe,
kiek noe dae auwe mit die jòng mòkkel loupe.
Aan dae kal hilt de keuning zich neit op,
Mit ein keuningin sjteit sien sjötterie baeter drop.
Peter Camps
(C) Wil Mohren 2018